Кошіцькый і Пряшівскый самосправный край ся зась запоїть до кампани Европского тыждня мобіліты (ЕТМ), котрый ся каждый рік одбывать од 16. до 22. септембра. В сполупрацї з ІДС Выход принесуть зляву в примістьскых автобусах, змаганя і далшы актівіты на підпору еколоґічного транспорту. TASR о тім інформовали КСК і ПСК. Актівітов, котра буде платити на цїлїм выходї, є путованя в примістьскім реґуларнім автобусовім транспортї протягом Меджінародного дня без авт за особливе путовне. КСК тыж дать можность путуючім выбавити сі протягом ЕТМ транспортну карту інтеґрованого транспортного сістему задарьмо. Зарівно вшыткым, котры дають предность зеленшій формі транспорту, додать здравый фрыштык і поможе при основнім сервісі біціґлїв. ПСК зась буде ціклосервіс превадзковати перед своїм урядом на Намістю міру. Од септембра тыж спустив змаганя ,,До роботы і до школы на біціґлю“ a в рамках підпоры путованя автобусами орґанізує і третїй рочник змаганя Зберай зелены кілометры. Близшы інформації о єднотливых актівітах суть опублікованы на вебовім сайтї www.idsvychod.sk.

(TASR, Шутіова)