Як інформовала Ужгородьска націонална універзіта, 9-го апріля 2023-го року перестало быти сердце нашого вченого, доктора біолоґічных наук, професора, славного ведучого Катедры біохемії і фармаколоґії Ужгородьской державной універзіты – Івана Туряниці. Іван Туряниця быв актівный і в русиньскім русі по 1989-ім році, быв членом Світовой рады Русинів і понад десять років быв головов Общества карпатьскых Русинів. За резултатами науковой роботы Іван Туряниця має приписаных понад 400 науковых публікацій і 25 патентів. Окрім іншого, быв записаный до книгы Найпопуларнішы люди Україны, а його популарность росла і за граніцями, і так його мено записане было і до книгы найзнамішых людей планеты. У 2004-ім році Світовый науковый комітет у Кембріджі нагородив го Діпломом Славы за выдатны досягненя в біохемії. В постсовітьскім періоді Іван Туряниця одкрыто выступав за автономію Підкарпатьской Руси (Закарпатьской области Україны) в рамках Україны, што быв і резултат референдума з 1991-го року, і за офіціалне вызнаня Русинів як окремого народа. Свої погляды пропаґовав почас навщів у різных европскых країнах. В роках 1994 аж 1998 быв депутатом Закарпатьской областной рады. Головов Общества карпатьскых Русинів быв од 1992-го до 2004-го року. Почас того періоду, в роках 1993 аж 2001, быв і членом Світовой рады Русинів за Україну. Іван Туряниця закликав до кодіфікації русиньского языка на Підкарпатю, сам є автором збіркы русиньской поезії, котра вышла під назвов Рудна земле пудкарпатська у 1999-ім році. Іван Туряниця мав 80 років. Вічная память! (ЛЕМ, Pkf)