Европска унія не буде толеровати огрожіня теріторіалной цілости, сувереніты і конштітучного подярку Босны і Герцеґовины, выголосила у віторок шефка діпломації Европской унії Кая Калласова в повязаню із сепаратістічныма кроками лідерів босняньскых Сербів. Підкреслила, же будьякы пробы о розділіня країны суть неприятельны. Выголосила то почас навщівы столиці Босны і Герцеґовины – Сараєва, в рамках свого подорожіня по дакотрых країнах западного Балкану. Босна находить ся посеред найвекшой політічной крізы за послідні десяткы років по тім, як быв лідер босняньскых Сербів Мілорад Додік у фебруарі одсудженый на рік арешту і шістьрічный заказ політічной діятельности за нерешпектованя рішінь высокого представителя Орґанізації зъєдиненых народів про Босну і Герцеґовину Хрістіана Шміда. Тот дозерать на дотримованя Дайтоньского мірного договору, котрый в 1990-ых роках закінчів войну в Босні.

(Медвідь, TASR)