Скоро 7000 людей ся у вівторок выдало на 100-кілометровый поход на памятку 30-го выроча геноціды в босняньскій Сребреніцi з юла 1995-го року. Товгды было забито веце як 8000 мослімскых мужiв і хлопцiв. Поход, котрый ся зачав в селі Незук, мать довести учасників до Памятного центра в Поточарi, де в пятницю одбудуть ся споминковы обряды і похороны семеро новых ідентіфікованых жертв. Дотеперь є похованых приближнo 7000 жертв, але коло 1000 людей іщі не є найдженых. Война в Боснi (1992-1995) выжадала собі 100.000 жертв. За воєнны злочіны і геноціду были дожывотно одсуджены ґенерал Ратко Младіч і Радован Караджіч. (TASR, Пкф)