Председа мадярьской влады Віктор Орбан публіковав у понедільок почас інавґурації нового америцького презідента Доналда Трампа курте відео на соціалній сіті, в котрім окрім іншого повів, же світ ся змінить, што буде добре про Мадярів. Пізно вечур заґратуловав Трампови і додав, же пришов час „обсадити Брусел“. „Теперь шора на нас, жебы сьме засвітили! Шора на нас, жебы сьме обсадили Брусел!“, написав вечур Орбан. Іщі дополідне в понедільок мадярьскый премєр выголосив, же боротьба меджі Споєныма штатами і Унійов почне у віторок. Повів то почас прояву на конференції о минулорічній презідії Мадярьска в Раді Европской унії.

(Медвідь, TASR)