Польскый презідент Карол Навроцькый в понедільок ветовав новелізацію закона о помочі гражданам Україны, котра мала продовжыти фінанчну підпору про біженців жыючіх в Польщі. Леґіслатіва мала розшырити дочасну охрану про україньскых біженців до 4-го марца 2026-го року, і управити выплачаня давкы 800 плус на діти. Інформує о тім аґентура PAP. Навроцькый арґументовав своє вето тым, же закон не рішыть вопрос условного выплачаня давкы тым, котры працують в Польщі. Презідент за своїма словами вірить, же 800 плус, значіть 800 злотых на дітину, бы мало быти доступне лем про тых Українців, котры ся возьмуть за роботу в Польщі. Пропозіцію, жебы тота давка выплачала ся лем міґрантам, котры працують, підтримовав і Навроцького головный протикандідат у вольбах Рафал Тжасковскый.

(Медвідь, TASR)