Америцькый міністер загранічных діл Рекс Тіллерсон днесь оголосив, же Споєны штаты Америкы будуть реаґовати до 1-го септембра на рішаня Москвы о зредукованю діпломатічного персоналу США в Росії. Тіллерсон журналістам почас навщівы Філіпін повів, же з планами Споєных штатів на одповідь до споминаной даты познакомив російского міністра загранічных діл Серґея Лаврова почас їх недільняйшой стрічі в Манілі. Шеф америцькой діпломації подля властных слов Лавровови повів, же Вашінґтон іщі все не вырішав, як буде реаґовати. Російскому резортному колеґови мав дати дакілько пояснюючіх вопросів о російскій реакції на санкції схвалены америцькым Конґресом.
(Петро Медвідь)