Америцькый презідент Доналд Трамп в понедільок вечур підписав декрет, котрым оддалив запроваджіня высшых цел на довоз кітайскых товарів о далшых 90 днів. Зробив то лем дакілько годин перед тым, як бы у віторок закінчіло ся „цолне переміря“, значіть дочасне знижіня высокых цел меджі двома найвекшыма світовыма економіками. Обидві економічны супермогучости роблять на досягненю договору о знижіню бізнісовых напруг по тім, як америцькый презідент дав строгы цла на десяткы країн. В місяці май ся Кітай і США добісідовали на 90-дньовім перемірю, а минувшый місяць в Штокголмі доїднали ся на далшых переговорах о продовжіню переміря по терміні 12-го авґуста.

(Медвідь, TASR)