Хорватьскый ґенералный прокуратор Дражен Йеленіч одступив з функції по тиску представителів влады по тім, як ся признав, же є слободомурар. Справу принесла аґентура Reuters. Премєр Андрей Пленковіч перед тым выголосив, же як Йеленіч неодыйде з функції, влада го з ньой одкличе. Йеленіч став ся ґенералным прокуратором в 2018-ім року. Дакотры представителі владнучой конзерватівной партії Хорватьске демократичне сполоченство Йеленічові вычітають, же своє членьство в здружіню слободомурарів мав ознамити перед наступом до функції. (TASR, Pkf)