Чорна Гора є моделом і прикладом европской інтеґрації про іншы країны у своїм реґіоні. Міністер заграничных справ і европскых діл СР Мірослав Лайчак то повів по першім дні свойой навщівы Чорной Горы. Путь до Чорной Горы є за його словами зачатком дальшой етапы навщів в рамках словацького председницьтва в Орґанізації про безпечність і сполупрацу в Европі (OBSE), а то суть навщівы місій в країнах юговыходной Европы. За словами урядуючого председу OBSE іде о країны, „котры собі ясні задефіновали европску перспектіву і котры ідуть по европскій дорогі“. Як далей Лайчак повів, „Чорна гора мать аж на єдну вшыткы капітолы отворены і є ясным лідром інтеґрачного процесу до Европской унії. Країна є за 13 років свойой незалежности важеным і решпектованым членом меджінародного сполоченства. Досягла много конкретных і много позітівных результатів.“  (ТАСР, Пкф)