Ізраіль і Ґреція договорили ся на вытворіню сполочной „подорожной бублины“ про людей защіпленых проти хвороты COVID-19. Інформовала о тім в понедільок аґентура DPA. Ізраільскый премєр Бенъямін Нетанъягу і його ґреческый колеґа Кіріакос Міцотакіс на стрічі в Єрусалимі были згодны з тым, же по змірніню обмеджінь в авіа-транспорті буде мож подорожыти меджі тыма двома країнами без потребы дотримати карантену. Договор бы быв основаный на взаємнім узнаваню зеленых вакціначных леґітімацій. Платити бы зачав такой, як бы было защіплене „вызначне проценто населіня і дійде ку зрушіню обмеджінь в подорожіню,“ повів ґреческый премєр.

(Медвідь, TASR)