День приступіня Словацькой републікы ку Европскій унії є памятным днём, котрым ся припоминать вступ Словакії до Унії. Стало ся то 1. мая 2004 а од року 2011 ся припоминать як памятный день. Позмінюючу пропозіцію схвалили посланцї Народной рады СР 26. октобра 2010. Першу пробу о схвалїня новелы закона о штатных святах, днёх робочого покоя і памятных днёх была першыраз в парламентї передложены і в юні 2007, але посланцї ю не схвалили. Словакія так вступила до ЕУ 1. мая 2004 в рамках дотепер найвекшого розшырёваня ЕУ. Ку 15 членім прибыло десять новых. По вступі СР до Еу можуть словацькы обчане в рамках єй вольно путовати, робити, штудовати і подникати. Проґрам Erasmus+ поволив уж веце як 40.000 словацькым штудентім спробовати сі штудії і жывот в загранічу.

(TASR, Шутіова)