26 лідерів членьскых держав Европской унії у віторковім сполочнім выголошіню написало, же Українці мусять мати слободу вырішовати о своїй будучности і діпломатічне рішіня мусить хранити україньскы і европскы інтересы. Высловили ся так перед планованов пятніцьовов стрічов америцького презідента Доналда Трампа і шефа Кремля Владиміра Путіна, інформує аґентура Reuters і AFP. В пресовій справі Рада ЕУ інформовала, же ку выголошіню членьскых держав ЕУ не приєднало ся Мадярьско. Лідеры Унії вітають намагы Трампа напрямом до закінчіня войны на Україні і досягненя справедливого і тырвалого міру і безпекы Україны. Єдночасно лідеры акцентовали, же справедливый мір мусить решпектовати меджінародне право включно прінціпів незалежности, сувереніты і теріторіалной цілости і того, же меджінародны граніці не сміють быти мінены силов. Подля выголошіня україньскый народ мусить мати слободу вырішовати о своїй будучности, і о мірі не може вырішовати ся без Україны.

(Медвідь, TASR)