В понедільок 29-го септембра собі в просторах Крайской бібліотекы Павла Орсаґа Гвієздослава в Пряшові перевзяли нагороды найліпшы авторы, котрых книгы были залучены до конкурзу Книга рока ПСК. О найліпшы книжковы тітулы Пряшівского самосправного краю змагали ся авторы уж у восьмім річнику того літературно-чітательского конкурзу. Тот рік было номінованых довєдна 44 книг в штирьох катеґоріях. В окремых катеґоріях творы оціньовали фаховы жюрі, в каждій катеґорії была уділена і ціна чітателів, котры могли за книгы голосовати. В катеґорії Белетрія про діти і молодеж выграв Давід Дзіяк із книжков Записник єдного хлопця. Белетрія про дорослых має переможкыню – Алену Бриндову із книжков Перекрочіня фронтовой лінії. В рамках Популарно-научной літературы выграла Анна Надьова із тітулом Почливость Янови Лазорикови – Духовне богатство нашых предків. Катеґорію Научной літературы выграв Петер Коня і колектів з книжков Історія Стропкова.

(Медвідь)