День памяткы жертв комуністичного режіму є памятным дньом Словацькой републикы і припоминать ся 24-го юна. Датум є повязаный з політичным арештантом і католічным дісідентом Сілвестром Крчмерім, котрый на суді в Тренчіні высловив 24-го юна 1954-го року тоты слова: ‟Вы мате в руках міць, але мы маме правду!‟ Призначену  новелу закона о штатных святах, дньох робочого покоя і памятных днів одобрили посланці Народной рады СР 3-го новембра 2020-го року. Предкладателі пропозиції новелы поуказали на то, же в рокох 1948 аж 1989 одсудили і арештовали з політичных прічін на Словакії высше 70 тісяч людей. Незаконны вердікты смерьти выконав  комуністичный режім над пятьома десятками людей,  нученыма роботами перешло веце як 13 тісяч  жытелів і інтервенованых было скоро 5 тісяч монахів і монахінь. (TASR, Pkf)