На воєньскый аеропорт в Кухіні коло Малацьок прилетіли в понедільок першы два словацькы літакы F-16. То першы із 14-ох, котры Словакія обїднала іщі в 2018-ім році. Літакы привезли із Споєных штатів Америкы америцькы пілоты. З тым быв повязаный і святочный церемоніал, на котрім брав участь презідент Петер Пеллеґріні, віцепремєр і міністер обороны Роберт Калиняк, начальник Ґенералного штабу Озброєных сил Словацькой републікы Даніел Змеко і далшы гості. Контракт на 14 літаків F-16 C/D Block 70 америцькой выробы підписала Словакія у 2018-ім році, но доданя із причіны пандемії опізнило ся. Словакія собі в США офіціално перевзяла першы два літакы кінцьом фебруара. Обидва літакы перед доданьом на Словакію хосновали ся на выцвік словацькых техніків. Третій літак бы мав на Словакію прийти до кінця року.

(Медвідь, TASR)