Коаліція  собі у вольбі кандідатів на уставных судців зволила чісто своїх кандідатів, выголосив то председа руху OĽaNO Іґор Матовіч по опублікованю выслідків голосуваня. „Будуть робити вшытко про то, абы собі забетоновали безтрестність на Уставнім суді СР (УС СР),“ повів то на марґо коалічных договорів. Посланці OĽaNO твердять, же скламали тоты, котры просаджовали тайну вольбу. Ян Будай (OĽaNO) назвав выслідок вольб за валцованя коаліції. За словами Луції Ніколсоновой (SaS) є „вольба кандідатів на уставных судців найважнішов, якой ся може допустити законодарный корпус. Уставный суд назвала пілєром правного штату. Тот пілєр є снажіньом і винов днешньой коаліції нефункчный. Видно, же тот став їх успокоює.“ О кандидатах вырішыли посланці вчера в тайнім голосуваню. Выбраты суть Іван Фіячан, Петер Молнар, Растіслав Кашак, Любош Сіґеті, Данєла Швецова, Міхал Трубан. На УС СР суть того часу лем четверо судцове з 13. Посланці мають выбрати 18 кандідатів, з котрых мать презідент СР выбрати девятьох новых уставных судців. Кедже вчера незволили потрібне чісло кандідатів, днесь вечур ся одбуде повторююча вольба. До ньой поступили вшыткы незволены кандідаты. (TASR, Pkf)