Од пятнлі 1-го авґуста 2025-го року Ян Штовка став новым директором Фонду на підпору културы народностных меншын, выменованый міністерков културы Мартінов Шімковічовов. Тото рiшiня є шыроко крітіковане за нетранспарентность процесу. Партія Magyar Szövetség – Мадярьска Аліанція уж подала поданя до Ґенералной прокуратуры СР з пожаданьом перевірити цілый выберовый поступ, і таксамо тото зробили і представителі меншын. Крітіка є напрямена на курту леготу на подаваня кандідатур, непублікованя імен кандідатів і тайне выслухованя без участи публікы ці фаховців з даной области. Міністерство културы одмітать обвиньованя, твердить, же процесс быв в згоді з леґіслатівов. Штовка є знамым музикантом і фотоґрафом, носителем европского тітулу Master Qualified European Photographer. Його выменованя выкликало великы діскусії в політічнім і културнім середовищу. Прокуратура буде перевіряти два поданя, включно з тым од членів Рады влады СР про народностны меншыны, котры поуказали на порушіня закона і недостаточну участь меншын. (ЛЕМ.ФМ, Пкф)