Махімална давка в безробітности ся од 1-го юла звышыть о веце як 40 евр місячні. Звышить ся і махімална ґаранчна давка, котра ся выплачать робітникам в сітуації платобной неспособности заместнавателя, i то 123 евр. Інформувала о тім Яна Грабкова з одбору комунікації Соціалной поіщовні. Высша махімална давка в безробітності ся дотулять тых, котры ся по 1-ім юлі заевідують на уряді праці до евіденції кандідатів о роботу, в послідніх штирох років были поіщены в безробітности найменше 730 днів і досягували в данім періоді заробіток над границю 2269 евр місячні. Махімална давка в безробітности так од юла досягне 1154,80 евр при 31-дньовім місяцю і 1117, 50 евра при 30-дньовім. Новы жадателі будуть дану давку мати можность брати махімалні шість місяців. (TASR, Pkf)