На одказ Чехів і Словаків, котры вмерли у бывшім концентрачнім лаґрі Нацвіллер-Штрутгоф у Алсасії, бы подля словацького премєра Петра Пеллеґрініго не мало ся забыти. Помочі тому має і памятна табла, котру в понедільок одкрыв вєдно із представительом Чеськой републікы при Раді Европы Емілом Руффером. Премєр підкреслив, же одкрытя бы не мало зістати лем сімболом. „Єдночасно бы то мав быти ясный одказ і ту, з того місця, же зробиме вшытко про тото, жебы ся ниґда веце такы звірства не повторяли, же будеме войовати проти тых, котры хотять знова ожывльовати демонів минулости і же є нашым моралным обовязком тот одказ і тых Чехів і Словаків, котры ту вмерли, в Алсасії, нести дале,“ повів словацькый премєр. За словами премєра бранами концентрачного лаґру Нацвіллер-Штрутгоф перешло веце як 360 Чехів і Словаків. Єдному ся подарило втечі.

(Медвідь, TASR)