Русины на Словакії собі у 2025-ім році припоминають 30 років од святочного выголошіня кодіфікації русиньского языка. Тота про Русинів важна історічна дія одбыла ся 27-го януара 1995-го року в Братіславі. З той нагоды Округлый стіл Русинів Словакії (ОСРС) выголосив на своїм посліднім засіданю в октобрі 2024-го року рік 2025 за Рік русиньского языка. Представителі ОСРС і партнеры платформы собі річніцю припомянуть 27-го януара в пополідняйшых годинах подійов при памятній таблі, котра кодіфікацію припоминать, на інтернатах Дружба в Братіславі. Якраз в конґресовій салі в рамках просторів Дружбы перед 30-ма роками одбыло ся выголошіня кодіфікації. Темов русиньского языка і річніцьов кодіфікації занимати ся буде в тім році  Русиньска оброда, Словацькый народный музей – Музей русиньской културы в Пряшові, русиньске высыланя в рамках Словацькой телевізії і радія, конкретно в Радію Патрія – Народностно-етнічне высыланя в Кошыцях. Рік русиньского языка своїм обсягом будуть в тім році припоминати і далшы русиньскы медії як радіо русин ФМ, двотыжденник НН інфо Русин ці часопис Русин. Свій вклад до споминаной події буде мати і Обчаньске здружіня Лабірьскы Русины, Основна школа з матерьсков школов з навчалным языком русиньскым в Кленовій а в непосліднім ряді Інштітут русиньского языка і културы Пряшівской універзіты в Пряшові. О вшыткых подіях, котры приправують спомянуты орґанізаціями, вас буде інформувати реґулярно в нашім інтернетовім радію русин ФМ.  Джерело фотоґрафії: Фацебоок/ ЛЕМ.фм (ЛЕМ.фм, Пкф)