Швеція „най не чекать“, же Турція підпорить їй вступ до Североатлантічной аліанції. В понедільок то выголосив турецькый презідент Речеп Таїп Ердоґан в реакції на вікендовы протиісламскы і прокурдьскы протесты в Штокголмі, інформує аґентура АFP. Ердоґан одсудив головно паліня Корану на протесті орґанізованім протиісламскым політіком Расмусом Палуданом, і означів то за ображіня музулманів. Крітіковав шведьскы уряды, же дозволили протест, котрый проходив у суботу перед турецьков амбасадов у столиці Швеції. Додав, же покля Швеція не вкаже решпект односно Турції і музулманів, „не дочекать ся жадной підпоры в повязаню з НАТО“.

(Медвідь, TASR)