На Словакії прибыло почас понеділька 27 новых припадів інфікації новым коронавірусом, цілкова кількость евідованых припадів хвороты COVID-19 підняла ся на 363. Днесь то оголосив премєр Іґор Матовіч з тым, же почас понеділька зробили 688 тестів. Неґатівных тестів є на Словакії дотеперь 7857. Матовіч додав, же з 27 новых пацієнтів є девять людей у віці над 60 років. Наймолодшым інфікованым є трирічна дітина, найстарым 80-річна жена. Позітівно тестованы за понедільок суть штири жены і двоми хлопи з окресу Братіслава, дві жены з окресу Глоговець, дві жены з окресу Нітра, дві жены з окресу Рожнява і двоми хлопи з окресу Требішов. Далше суть меджі нима жена з окресу Чадця, жена з окресу Бановці над Бебравов, Мартін, Михалівці і єдна з окресу Жіяр над Гроном. Єден інфікованый хлоп є з окресу Бардейов, по єднім з окресу Ґаланта, Новы Замкы, Прієвідза, Свідник, Тренчін, Тырнава і єден хлоп з окресу Жіліна.

(Медвідь, TASR)