Словакія має інтерес о стабілну, демократічну і просперуючу Україну, як і о проглубліня співпраці і общый розвиток білатерланых односин зо своїм сусідом. У выголошіню ку резултатам другого кола презідентьскых выборів то написало Міністерство загранічных діл і европскых справ Словацькой републікы. Словакія подля резорту діпломації тішыть ся на співпрацу з новым україньскым презідентом Володиміром Зеленьскым, котрый у выборах здобыв міцный мандат. „Словакія є далше приготовлена підпорьовати інтеґрачны ашпірації Україны і помагати їй в реформных процесах в сучаснім нелегкім періоді, причім довгодобо підтримує сувереніту і теріторіалну цілость Україны в рамках меджінародно признаных граніць,“ выголосило міністерство.

(Медвідь, TASR)