Словацьке народне повстаня было за словами Петра Пеллеґрінія єдным із найяснішых місць словацькой історії. Премєр то повів в понедільок із нагоды ближачой ся 74-ой річніці повстаня, кедь положыв вінець на братіславскім Намістю СНП. „Словацьке народне повстаня было основным проявом рішальности і волі словацького народа і його історічным моментом. Нашы предкове не прияли свою долю пасівно, як при веце іншых зломовых моментах, а поставили ся проти єдной із найліпшых армій світа. Будьме їм вдячны за їх рішіня, честуйме їх геройство, і припоминайме собі память вшыткых, котры за свободу оддали своє жытя,“ повів на пієтнім актім Пеллеґріні. Премєр признав, же на Словакії звыкло кланяти ся героям головно на місцях, де войовали, і же Братіслава якбач не є найтіпічнішым місцьом. Но наперек тому, же ся прямы бої головного міста не дотулили, Братіслава ся подля Петра Пеллеґрінія ку одказу СНП голосила і голосить. В повстаню войовали і Русины, но довгый час в Музею СНП в Баньскій Быстріці браковала їх таблічка меджі таблічками далшых народів, котры на тых боях брали участь. Русины мають свою таблічку в музею од 2015-го року.
(Медвідь, TASR)