Підпредседа Европской Комісії про Енерґетічну унію Марош Шефчовіч в понедільок рано в Европскім парламенті представив підпору девятьох соціалнодемократічных партій із девятьох членьскых держав, што му давать право, жебы слідуючій рік міг кандідовати на посаду председы екзекутівы Европской унії. Намагав бы ся головно о єдность унії. Підпору му дала і словацька опозіція. Словацькый еврокомісарь про TASR признав, же минулу середу почас слуханя Юнкерового прояву роздумовав, якы моменты бы спомянув він, кебы говорив о візіях унії. „Думам, же то, што бы до тых діскусій принесла векша присутность представителів середньой і выходной Европы, бы было підкресліня моментів, як скоріше знижыти розділы меджі восточныма і западныма державами, як ся веце слухати, жебы сьме сі ліпше розуміли. І як заборонити тому, жебы не пришло ку новому діліню меджі выходом і западом,“ повів Шефчовіч. Марош Шефчовіч, котрый є в службах екзекутівы Европской унії уж 10 років, при оголошіню кандідатуры звернув увагу, же треба забезпечіти, „жебы тото столітя было европскым“.
(TASR, Медвідь)