Рух Sme rodina пропонує заказ продаваня і хоснованя дакотрых піротехнічных выробків катеґорії F2 і F3. Іде о такзваны петарды, котрых головным ефектом є гукот. Єдночасно пропонує уточнити час хоснованя остатньой забавной піротехнікы, і то 31-го децембра од 18.00 до 24.00 і 1-го януара од півночі до 02.00 год. Передкладателька новелы закона Петра Кріштуфкова о тім інформовала днесь на пресконференції. За словами депутаткы Кріштуфковой на новелі ся робило майже два рокы, і робила на тім робоча ґрупа про область ветерінарной старостливости і охраны звірят председы выбору про польногосподарьство і жывотне оточіня. Як арґументовала, выробкы, котры хотять заказати, мають веце неґатівных впливів на людей, звірята, природу і запричінюють найвекшы шкоды на маєтку. Вказала наприклад на неґатівный ефект такой піротехнікы на псіхічный стан старшых людей ці людей з порухами душевного здоровля, як і на сполоченьскы, господарьскы або волньі жыючі звірята.

(Медвідь, TASR)