Міністерство здравотництва Словацькой републикы представило свій замір выбудовати по цілій Словакії сіть урґентных приймі. Найбівше заступліня в 44 крайскых і окресных містах будуть мати урґенты І. Тіпу. Мать быти зложеный з єдной містности с постільов, котре є призначене на мерькованя пацєнта. В амбуланції урґентного прийму буде пацєнтім 24 годин і сім днів в тыждні к диспозиції здравотницкый персонал с лікарьом. Урґент першого тіпу буде в Пряшові, Бардійові, Гуменнім, Старій Любовні і Вранові над Топльов. Кошыці і Попрад будуть мати урґент ІІ. Тіпу, котрый є вышшого штандарту. Цілково їх на Словакії мать быти шість про дорослих а штирі шпеціалізованы дітскы. Мають вызерати як галы із знамых лікарьскых філмів ці серялів. Буде ся в них давати высокошпеціялізована неодкладна здравотна старостливість. Їх частьов будуть і травмацентра. В них бы мало быти мінімалні 10 постілі на єдноткі інтензівной старостливості , шість на анестезіолоґіцко – ресусцітачнім одділіню а найменше тридцять на одділіню уразовой хірурґії і ортопедії.
(Петро Кімак-Фейко)