Од 14-го до 16-го септембра быв на навщіві Словакії ватіканськый державный секретарь кардінал Піетро Паролін. Свою навщіву завершыв на історічнім одпустовім місці ґрекокатоликів –  у Клокочові, в суботу дополідне. Торжество почало молитвов акафісту, на кінцю котрого кардінал приступив ку Іконі Клокочівской Богородіці, поціловав єй, і подаровав стріберну ружу, котра зістане в містнім храмі. Кардінал быв пак головным служытельом архієрейской літурґії. Паролін по літурґії посвятив новый Путницькый дім, перед котрым вєдно з кошыцькым єпархом владыком Кірілом Васильом посадили стром, якый буде припоминати навщіву кардінала в Клокочові.

(Медвідь, TSKE)