В днях 20-го і 21-го мая 2022-го року одбыло ся вже XI. Меджінародне бєнале лемківской/русиньской културы, котрого орґанізатором є Стоваришыня Лемків. По штирьох роках знова зышли ся в польскій Криниці Русины з европскых держав. В рамках културного проґраму бєнале одбыли ся три концерты, два в пятніцю і єден в суботу, на котрых одпрезентовали ся фолклорны колектівы і соловы артисты з Польщі, Словакії, Україны, Румунії і Хорватії. Так само была почас цілого бєнале в салі іншталована выстава русиньскых малярів з карпатьского реґіону, як і з нижньой землі. Першый пятніцьовый концерт бєнале мав і свою церемоніалну часть, почас котрой вручали ся нагороды. Томаш Оцеткєвіч як представитель містных властей на події вручав Золотый Крест Заслугы Петрови Трохановскому. Уділив му го презідент Польщі Анджей Дуда за його довгорічну діялность. Далше в проґрамі слідовало вручаня Премії Василя Турока-Гетеша і Націоналной премії за русиньске уменя імени Івана Манайла Pro Arte Ruthenorum. Обидві премії вручав председа Світового конґресу Русинів Штефан Лявинець. Лавреатом Премії Василя Турока-Гетеша за свою довгорічну діялность в русиньскім русі став за 2022-го рік Дюра Папуґа із Сербії. Лавреатом Націоналной премії за русиньске уменя імени Івана Манайла Pro Arte Ruthenorum став in memoriam домашній умелець Штефан Телеп. В рамках бєнале проходила і робоча часть проґраму. Одбыло ся засіданя Світовой рады Русинів. (LEM.fm, Pkf)

Жрідло фотоґрафії: facebook radio LEM.fm