Пряшівскый самосправный край (ПСК) од четверя приїмать жадости од жадателїв до трёх выголошеных дотачных вызев на рік 2026. Цїлково роздїлить аж 2,4 міліона евр. Села, міста, незісковы орґанізації, обчаньскы здружіня, реґістрованы церькві ці фізічны а правницькы особы можуть посылати жадости до 1. фебруара 2026. TASR о тім інформовала Леа Леготска з оддїлїня комунікації Уряду ПСК. Шырока верейность ся може запоїти до Вызвы посланцїв ПСК, Вызвы Партіціпатівный розрахунок а Вызвы Рісїня потравиновой доступности. Найвекша сума грошей, аж 1,95 міліона евр з цїлковой сумы 2,4 міліона евр, є алокованых у Вызві посланцїв ПСК. ,,Інтересуючі ся можуть в тій вызві уходити о фінанції в семох проґрамох, а то шпорт, култура, соціалны службы, родинна самосправа, підпора жывотного окружіня а розвиток енвіронменталнoй свідомости, підпора проспешных служеб в здравотництві, дїти і молодеж. Мінімална вышка дотації є 500 евр, максімална 5000 евр, причім сполуфінанцованя з боку жадателїв є становлене на уровни 20 процент зо схваленой дотації. Успішны жадателї бы мали быти знамы в маю 2026,“ повіла Леготска.  Близшы інформації о условіях вызев суть опублікованы на вебовій сторіцї самосправы.

(TASR, Шутіова)