Днесь у віці 91 років вмерла довгорічна артістка бывшого Україньского націоналного театру, днесь русиньского Театру Александра Духновіча, Марія Корбова. Марія Корбова народила 24-го авґуста 1930-го року в русиньскім селі Рунина, Сниньского окресу. Належала меджі першу ґенерацію нашых акторів у театрі, а єдночасно меджі найвызначнішых нашых артістів. На сцені вытворила множество ролей, котры ся вызначовали щіростьов, темпераментом, култівованостьов сценічного прояву і выразным баршановым голосом. Тот часто схосновали і радіовы режісеры. Свідчать о тім десяткы награных радіовых пєс, приповідок і Кумівскых бісід, в котрых выступала як кума Параска. Блаженый покій і вічная память!

(Медвідь, TASR)