В половині юна 2025-го року перевзяв Вігорлатьскый музей в Гуменненім од рештавраторкы зрештаврованы іконы із барокового іконостатусу деревяного Храму святого Михаіла Архістратига, котрый походить із русиньского села Новоселіця, Сниньского окресу. Храм быв першым обєктом, котрый быв у роках 1972 аж 1974 перенесеный до взникаючой Експозіції народной архітектуры і бываня втогдышнього Окресного краєзнавчого музея в Гуменнім – сканзену. У 2024-ім році храм святковав 260 років од збудованя в Новоселіці. Уж при його перенесіню в 1970-ых роках мусили быти дакотры іконы рештаврованы. У 2023-ім році, по пятьох декадах, Вігорлатьскый музей почав першу етапу нового рештаврованя. Тота были закінчена восени 2024-го року. В рамках ньой были зрештаврованы три іконы головно ряду іконостасу. Кедьже музей мав схвалену дотацію із Фонду на підпору уменя на дофінанцованя другой етапы, а так само му допоміг Пряшівскый самосправный край, котрый є зряджовательом музея, мож было од року 2024 зрештавровати далшы штири іконы спіднього ряду. У вшыткых ікон іде о мальбу темперов на дочках, окрасны елементы і дакотры елементы на поставах суть управлены стрібріньом на поліменті. Іконы были, так як і в першій етапі, рештаврованы Людмилов Зозуляковов. Джерело фотоґрафії: ЛЕМ.ФМ/Facebook. (ЛЕМ.ФМ, Пкф)