І тот рік Вігорлатьскый музей в Гуменнім у співпраці із Окреснов орґанізаційов Унії жен Словакії зорґанізовали вже 32-ый річник меджінародного конкурзу Карпатьска писанка 2024. Выстава із тогорічного конкурзу была одкрыта 7-го марца 2024-го року у Выставній салі Ореста Дубая. Уж 32 років приносить конкурзна выстава Карпатьска писанка розмаїту і фаребну плеяду писанок, як інформовала Вероніка Латтова із Пресового одділіня Містьского уряду в Гуменнім. Тот рік мож на выставі видіти довєдна 560 писанок од 59-ох авторів, котры до конкурзу приголосили ся. Окрашены яєчка до Карпатьской писанкы 2024 посылали нелем реґіоналны і словацькы художници, але і автoры з Мадярьска, Польщі і Україны. Выставу буде мож у Вігорлатьскім музею видіти до 21-го апріля того року. (ЛЕМ.ФМ, Пкф)