x

В Малім Шарішу вышляхтили нову одроду маку

00

В рамках Дня поля обиловин, репкы і маку в Малім Шарішу ся польногосподарї з выходной Словакії обознамили з новов одродов маку. Вышляхтили єй в містній выскумно-шляхтительскій станіцї. Нова одрода была представлена навщівникам. Приближыли і якы условія і аґротехніку треба на єй пестованя. Проґрам быв дале заміряный на репку і обиловины а їх ошетрёваня і пестованя. Беата Брезінова, выскумнічка з Выскумно-шляхтітельской станіцї в Малім Шарішу представила процес шляхтїня маку: „Є то процес, котрый зачінать або мішанём двох родічовскых сорт, матерьской і отцёвской, або выбером даякых краёвых ці містных локалных сорт. Протягом вісем аж десять років ся чоловік допрацує к матеріалу, котрый є в такій якости, жебы міг быти приголошеный до штатных покусів. Потім уж залежить, як обстоїть в тестованю, ці переконать сорты, котры суть в сортіментї.‟ Як увів ведучій Выскумно-шляхтительской станіцї в Малім Шарішу Любош Настішін: „Наша выскумна станіця ся занимать главно шляхтїнём маків, пшеніць і утримуючому шляхтїню нашых словацькых сорт команіцї. Тота станіця належить меджі останнї в Словакії, таже собі то треба утримати, бо уже кедь заникне і тото, так будеме вшытко довожовати із заграніча.‟ Насїня котре вышляхтять в Малім Шарішу продають пестователїм дале, причім експортують главно до Чех.
(Korzar)