Планована реконштрукція Музея модерного уменя Енді Варгола (ММУЕВ) в Меджілабірцях заты не мать ґарантоване фінанцёваня. Першы два міліоны евр з цїлкового розрахунку 7,1 міліона на обнову европского унікату, котре мав резорт фінанцій на основі узнесіня бывшой влады уволнити до конця януара, здряджователёви музея Пряшівского самосправного краю заты не пришли. Директор ММУЕВ Матрін Цубяк і наперек тому вірить, же ся пінязї найдуть. Кедьже меджічасом пришла коронакріза, Цубяк сі усвідомлює, же пріоріты штату суть актуално інакшы. Вірить але, же їх веце як рочна інтензівна робота невыйде назмар а проєкт ся, хоць пізнїше, дочекать своёй реалізації в подобі, яку влада первістно схвалила. ,,Інакше бы сьме ся мусили вернути цалком на зачаток,“ доповнив директор. ,,Міністерство фінанцій сі усвідомлює значіня Музея Е. Варголу, котре перекрочує граніцї Словакії, а зато резорт зробить вшытко прото, жебы ся сітуація вырїшила што найскоріше,“ выядрили ся про TASR з тлачового одбору міністерства.

(TASR, Шутіова)