Посланці крайского заступітельства ся в понеділок, 12-го фебруара, стрітнуть по першый раз в тім року на своїм засіданю. На проґрамі мають 31 пунктів, меджі іншыма управу розрахунку і одобріня фінанчного вкладу у вышці скоро 95-тісяч евр про пять субєктів реалізуючіх опатріня соціалноправной охраны дітей і соціалной курателы на теріторії края. Заоберати ся будуть тыж одобріньом вступу до многых проєктів, але і одобріньом інвестичного плану ‟Добудованя ціклоінфраштруктуры Полонины трайл, 1-ша етапа траса Снина‟, причім предпокладана цілкова ціна з DPH бы мала представувати 1,5 міліона евр. Предметом засіданя буде окрім іншого і даня підпоры проєкту місту Гуменне в рамках Міста културы 2024. Пряшівскый самосправный край дасть місту цільову дотацію 25-тісяч евр на выбудованя нового културно-комунікачного центра. (TASR, Pkf)