Пряшівскый самосправный край (ПСК) вєдно із своїма реґіоналныма бібліотеками знова глядать найліпшы книгы повязаны із реґіоном. Як інформовало Одділіня комунікації ПСК, девятый річник літературного конкурзу Книга рока ПСК принесе оцінку найінтереснішых публiкацій выданых в попереднім році. Термін на номінації книжок, котры были выданы в 2025-ім році, і суть скапчаны із Пряшівскым крайом тематічно або особов автора текстовой ці образовой части, є до 30-го апріля 2026-го року. До конкурзу мож номіновати друкованы вязаны або брожованы публікації із приділеным ISBN в словацькім языку, котры вышли од 1-го януара до 31-го децембра 2025-го року. В актуалнім річнику можуть быти номінованы і книгы в русиньскім а україньскім языку, тоты книгы оцінюють ся раз за два рокы. Номінованы можуть быти русиньскы книгы, котры вышли од 1-го януара 2024-го до 31-го децембра 2025-го року. (LEM.FM, Пкф)