Заступцове верейной справы і актері путёвого руху підписали меморандум о кооперації напрямене на сполочный розвиток Земпліньской шіравы. Документ мать підпорити коордінацію актівіт і сістематічный розвиток рекреачной локаліты. Штатна таёмнічка Міністерства путёвого руху і шпорту Словацькой републікы Яна Штіліхова з той нагоды підкреслила, же Земпліньска шірава мать подля міністерства великый розвитковый потенціал. Цїлём кооперації є посилнити поставлїня Земпліньской шіравы як атрактівной турістічной дестінації а продовжовати в єй утримателнїм розвитку. Сполочным заміром є зарівно приспіти ку обнові популаріты той локаліты. ,,Візія є наставлена єднозначно так, жебы ся Земпліньска шірава розвивала а жебы мала досяг і на економіку штату,” увела Штіліхова. Председа КСК Растїслав Тырнка увів, же роблять на проєктох, котры выздвигнуть шіраву, ці уж в области інфраштруктуры або зьякостнёваня служеб. ,,Підписом того меморанда ся то не кончіть, праві наспак – зачінать. Іде о коордінацію актівіт, котры будеме робити. В першім шорї ся договориме на замірі а наслїдно ся будеме коордіновати і коло подаваня проєктів,” увів Тырнка.

(TASR, Шутіова)