Як інформовала Леа Геілова з Одділіня комунікації і пропаґації Пряшівского самосправного краю (ПСК), реконштрукція на будинку, котрый служыть інтересуючім ся о астрономію як простор про фаховы актівности і уквартельованя, бы мала быти закінчена до кінця того року. Стріха астрономічного робочого місця в Розтоках, котре є шпеціалізованым одділіньом Піддукляньского освітнього центра у Свіднику, перейде од септембра реконштрукційов, котру зафінанцує ПСК як зряджователь інштітуції, і проінвестує на тых роботах довєдна 200 тісяч евр. В рамках реконштрукції комплетно вымінять ся деревяны шындлі за новы, в цілковім вымірі 520 квадратных метрів. Ручно робленый шындель ся законзервує, зробить ся ізолація стріхы, зреконштруованы будуть пошкоджены части облаків, а затеплить ся і веранда. 94-річный обєкт быв збудованый як деревяна зрубова ставба, часточно підпівничена. Будова служыть як обсерваторія з можливостьов уквартельованя про 30 особ у двох апартманах і пятьох ізбах. В ареалі є і кухня, їдалня а сала про лекції. Послідня велика реконштруцкія там проходила у 2003-ім році.  Фото: Яно Штовка, MQEP. (Петро Медвідь, ЛЕМ.ФМ)