Перед радніцю в Кежмарку уж о три місяцї прибуде нова фонтана, з єй выставбов ся зачало в тых днёх. Ведуча оддїлїня теріторіалного плану, жывотнёго середовища і ставебного порядку містьского уряду Ева Келбелова увела, же высутяжена цїна за дїло є скоро 194 000 евр. Проєкт є часточно фінанцованый з Проґраму черезгранiчной співроботы Interreg V-A Poľsko- Slovensko 2014-2020. ,, В тім ту припадї нейде лем о выставбу самой фонтаны, але о цїлкову управу цїлой зеленой плохы перед радніцёв. Розсяг ставебных управ загорнює реалізацію водного елементу з односнов технолоґіов забудованов в сутеренї радніцї, управу плафону сутерену, длаждены плохы, освітлїня, лавічкы, смітны кошы, стоян на біціґлї і вытоковый стоян на воду,” конкретізовала роботы Келбелова з тым, же сучастёв проєкту є і перемістнїня клїткы ганьбы. Доводом, чом місто вырїшыло рівно на тім місцї збудовати фонтану є факт, же під плохов ся в сутерені радніцї находить студня, то значіть воднe жрідло, котре ся дасть вывжыти на такый замір.

(KORZÁR, Шутіова)