Словацькый народный музей – Музей русиньской културы в Пряшові з нагоды цілословацькой музейной події, котра ся одбуде 18-го мая т. р. і мать назву „Ніч музеїв і ґалерій“, приготовив ряд акцій. Одбудуть ся од 15-ой до  21.30 год. в просторах музея. Подія зачне творчіма ділнями – практічным указованьом  ремесел нашых предків. Конкретно піде о  крашіня писанок різныма техніками і тканьом покровців на стародавных кроснах. Тота часть проґраму є веце орьєнтована про дітей. Про тых старшых зо зачатком о 17-iй годині буде лекція під назвов Світ ікон. В ній ся навщівници дізнають нелем о значіню ікон в нашім хрістіаньскім жывоті, але і о значіню сімболікы зображованя ікон. Тот день ся буде нести в історічнім дусі. Доказом того буде і проєкція двох документарных філмів. Першый буде 20-минутовый  філм, котрый приближує жывот Русинів на Підкарпатю в 30-ых роках минулого столітя.  Інтересным буде і далшый короткый документ, в котрім як головный розповідач выступить Юрко Харитун, вызначный русиньскый писатель. Він розповість о звыках на Пасху  в Сниньскім реґіоні. Приємным ожывліньом і сприємніньом музейных подій буде выступліня співацького трія Лабірьскых бетярів з Меджілаборець. (Пкф)