Вылетну шіфу Богемія вчера вечур в рекреачній часті Домаша Добра святочно поблагословив кошыцькый рімокатолицькый архієпіскоп і метрополіта Бернард Бобер. Акції, котры кулмінували одпаліньом огньостроя і россвічіньом шыфы, брав участь і премєр Петер Пеллеґріні. За словами Пеллеґрініго є тота вылетна шыфа на Домаші прикладом хоснованя потенціалу розвоя туристичного руху, котрый Домаша мать. „Сама шыфа вєдно з енормным тяжкым транспортом собі выжадала дотацію од влады у вышкі вецей як 600.000 евр, але як мам інформації, уж од першого дня выкликує великый інтерес,“ повів Пеллеґріні. Як далей повів староста села Кваковце Радован Капраль, „в часі вікендів робиме пять вылетів, через тыждень штирї. Покы сьме мали скоро вшыткы плавбы выпроданы, єдну сьме мусіли зрушыти з причины злой погоды. Меджі людьми є о плавбу великый інтерес. На шыфі маме приправеный проґрам, люде ся дознають нелем то, што ся на Домаші колись одбыло, як ся будовала, але і то, яка была історія в нашій країні“. (TASR, Пкф)