Недостаток доджу, котрый запричінює знижіня выдатности водных джерел про сельскый водовод, обмеджує жытелям села Воліця, Меджілабірьского окресу, звычайны потребы. „Не годны суть райбати, варити, заваряти, мыти ся, допестовати властны продукты, без воды просто не мож жыти,“ бісідує про аґентуру TASR старостка Воліці Моніка Рогальова. Покля така сітуація буде і в далшых роках, село буде мусити глядати далшы водны джерела. Як пояснила старостка, сельскый водовод збудовали жытелі Воліці самопомічно в роках 1965 аж 1967. У 2017-ім році обновили вдяка дотації од Енвіроменталного фонду водны джерела, влони з єднакого фонду реалізовали першу етапу обновы водоводных рул на трасі коло головной драгы, де жытелі не мають достаток воды. Подля Рогальовой треба іщі обновити трасу водоводу в центрі села. Село подавать жадость на енвірофонд о дотацію каждый рік. “Властны фінанції села на такы інвестіції не старчать, без дотацій їх село не може реалізовати,“ доповнила. Проблема з недостатком воды в сельскім водоводі за словами старосткы повторять ся в літі в сухім періоді шторічно, но тот рік є то „барз плане“. (ЛЕМ.ФМ, Пкф)