Як в понедільок інформовало Пресове одділіня Святішого Престола, Папа римскый Франціск прияв зречіня пастырьского ряджіня Пряшівской архієпархії архієпіскопом і метрополітом Йоаном Бабяком. Єдночасно Вселеньскый Архієрей призначів владыку Петра Руснака, братіславского єпарху, за апостольского адміністратора sede vacante Пряшівской ґрекокатолицькой архієпархії. Владыка Бабяк у своїм выголошіню інформовав, же абдікацію подав іщі 24-го фебруара, і подав єй  „про покій і про добро Церькви, єпіскопів, священиків і віруючіх“. Кір Йоан быв за пряшівского єпарху призначеный 11-го децембра 2002-го року, рукоположеный на єпіскопа быв 6-го януара 2003-го року Папом Йоаном Павлом ІІ. в Базиліці св. Петра в Римі. По реорґанізації Ґрекокатолицькой церькви на Словакії з 2008-го року на метрополітну церьков sui iuris став першым пряшівскым архієпіскопом і метрополітом.

(Медвідь)