Пряшівскый самосправный край (ПСК) планує в рамках черезгранічной співпраці модернізовати Вігорлатьску звіздарню в Гуменнім о шпеціалный телескоп, котрый має служыти на астрономічны слідуваня і мобілну детекцію світлового знечіщіня. Вступ до проєкту схвалили крайскы посланці на фебруаровім засіданю. Пресаґентуру TASR о тім інформовала ведуча оддліня комунікації ПСК Даша Єленьова. Головным цільом проєкту з назвов „Карпатьскый звіздный облак“ є модернізувати технічну часть обсерваторія на Колоніцкім сідлі новов техніков. Планованый телескоп має быти подля самосправы вынятковым свого сорту в Словакії і дозволить сістематічный моніторінґ світлового знечіщіня на обох бокох граніці. Проєкт із передпокладаным буджетом скоро єден міліон евр рахує окрем накупу технікы і выбудованя станіць на моніторованя і  з орґанізаційов конференцій, одборных семінарів і робочіх стріч венованых охрані тмавого неба, парків і розвою астротурістікы. (TASR, Пкф)