Місто Свідник хоче застрішыти ледову плоху і тым продовжыти їй хоснованя. Влада на тот ціль на выїздовім засіданю в Ґіралтівцях 17-го септембра приділила 300 тісяч евр. „Сьме барз рады, же сьме таку частку могли здобыти. Сума 300 тісяч евр є дакус менше як половина того, што нам реално буде треба на застрішіня ледовой плохы. Моментално сьме в штадію задаваня технічной шпеціфікації про выпрацованя проєкту. Хочеме знати, як буде конштрукція вызерати, жебы сьме ся вываровали конштрукчных хыб, котры сьме виділи при іншых застрішеных ледовых плохах. Наприклад кондензація і пак паданя воды на ледову плоху або іншы з тым повязаны технічны проблемы,“ повіла пріматорка Свідника Марцела Іванчова. Решту грошей хоче місто здобыти з вызвы про реґіон, котру шторік выголошує Пряшівскый самосправный край, але ословлять так само екстерны жрідла, наприклад і Словацькый союз ледового гокея, кедьже у Свіднику ся подля пріматоркы розвивать база про гокей.

(Медвідь, TASR)