Рештавраторьске дослїджіня сперед чотырёх років одгалив важны пошкоджіня сохы, переважнї в спіднїй части. Соха была одллята в роцї 1841. Днесь стоїть на надворю каштеля. В тім роцї ся до єй оправ пустив академічный сохарь Станїслав Кожела. Роботы на обнові сохы за нецїлых 25 тісяч евр ся дісталидо другой половины а помалы фінішують. Подля змлувы мають быти закінчены до 15. децембра. Сохар рештавровав соху гнедь на надворю каштеля. Поступно з нёй давав гет вшыткы нежадучі верствы фарбы. Звыразнили ся так черты тварї, очі Геркула а на тїлї гідры суть ясно роспознательны шупины. Сохарь мусїв наново вымоделовати голову гідры. Єдну з трох голов вкрали. Провізорно єй дочасно наградили епоксідовым одлятком. Але з добовых фотоґрафій было ясне, же голова вызерала інакше. Сохар выцестовав до Ужгороду, де є друга соха Геркула, жебы відїв, як має вызерати. В Снинї пак зробив садровый одляток . В сучасности є уж голова в злїварни і чекать на одллятя.
(Зденка Цітрякова)