До обновы водоводів і каналізації інвестує Подтатраньска водареньска сполочность (PVS) приближно 18 міліонів евр. Підпредседа Пряшівского самосправного краю (ПСК) Штефан Бєляк інформував, же сполочность з тым цільов уж підписала 11 договорів, респектівно проєктовых замірів, і то в рамках Інтеґрованой теріторіялной стратеґії (IÚS) ПСК на рокы 2021 аж 2027. „Вшыткых 11 проєктів было схваленых Радов Партнерства ПСК на основі рекомандації Кооперачной рады реґіону Спіша, чім ся забезпечіло фінанцованя даных проєктів з джерел Европской унії з Проґраму Словакія,“ повів Бєляк з тым, же іде о проєкты поданы в рамках опатрінь – Обнова публічной стоковой сіті і чістічок одпадовых вод над 2000 еквівалентных жытелів і Обнова публічных водоводів в селах над 2000 жытелів. Споминаны проєкты будуть реалізовати ся на теріторії штирьох окресів – Попрад, Кежмарок, Левоча і Стара Любовня. (TASR, Пкф)