За незрозумітельну, одпуджуючу і смішну означіли вчера представителі опозиції стрічу мадярьского премєра Віктора Орбана з російскым презідентом Владіміром Путіном в Пекінґу. Увела то в репортажі комерчна телевізія ATV, подля котрой многы аналітіци збачіли, же Орбан в дебаті з Путіном обыйшов терміну война і конфлікт на Україні означів за “воєньску операцію“, як то робить од зачатку Путін. Про опозичну партію Моментум є споминана стріча незрозуміла. Російскый презідент подля єй посланця Мартона Томпоса є одповідный окрім іншого і за прилив міґрантів, проти котрым Орбанова партія Фідесз боює. Подля Демократічной коаліції (DK) зробив Орбан данов стрічов ганьбу Мадяром.  (TASR, Pkf)